أرشيف مدونة رابطة الكتاب العرب على الفيس بوك

الثلاثاء، 14 أبريل 2015


عيونك وطن
......................
صباح الجمال والدلال ياوطن
صباحك معطر بريحة البارود
وابنك مزنهر غفير عالحدود
وبنتك من البرد واقفه تتكتك
بتاكل رغيفها بسوسه ودود
صباح الجمال والدلال ياوطن
......................
صباح الجمال والدلال ياوطن
صباحك جنانى بحكمة يمانى
وعقل إنجليزى وشغل امريكانى 
وحبه صومالى يانيلنا ياغالى
بتروى العطاشى فى جنة عدن
صباح الجمال والدلال ياوطن
......................
صباح الجمال والدلال ياوطن
صباحك مقاومة وحلاوة دمشقى
ياكحلة عيونى ياإدلب ياعشقى
ياكوفه كفاية يانجف الصبايا
يافاس المواجع ياتونساوى راجع
جزاير وحاير بخاف الفتن
صباح الجمال والدلال ياوطن
......................
صباح الجمال والدلال ياوطن
صباحك مزيت بلونك ياخام
ووشى ملخبط بزفت وسخام
أدق النافورة تطلع فلوس
تطرطش يازيتى تعوم النفوس
نفوس مايساويها قماش الكفن
صباح الجمال والدلال ياوطن
......................
صباح الجمال والدلال ياوطن
صباح التجلى بصوتك ياباسط
رغيف جوز فلافل وبفطر و هاصت
وشاى حبر نيله بيعدل دماغى
وصحة عليلة بتاكل فى داغى
وفرشة رطوبة واكلها العطن
صباح الجمال والدلال ياوطن
......................
صباح الجمال والدلال ياوطن
ياعم الوطن إحنا ليه حايرانين؟
وليه ياوطنا تملى حزين
ماتفرح شويه وتنسى القضية
شويه هفيه شمالنا يمين
ماترحم أبونا وترمى اليمين
وسيبنا نعيش من جديد الوطن
......................
صباح الجمال والدلال ياوطن
......................
عادل التونى