أرشيف مدونة رابطة الكتاب العرب على الفيس بوك

الجمعة، 5 أكتوبر 2018

(والله كبرت ياواد)

الشاعر/تامر محمد يكتب /.......
و الله كبرت يا واد 
و الشعر الأبيض بان 
مبقاش بيقولوا عليك عفريت 
و لا جن مصور زي زمان
و عرفت تحجر في دموعك 
بعد ما كنت تبل عنيك 
ع الفاضي و ع المليان
و صحابك هجروا حيطان البيت 
و محدش منهم بيجيلك 
كل الأبديت مش من جيلك 
جسمك مش قادر على طوعك
و الحب اللي تعبت عشانه
مبقاش ساكن في ضلوعك 
خليك قاعد و اسمع فيروز 
لو حد مدايقك . عديله
مش زي ما كنت بتديله
أخرك تتضايق تضرب بوز
و القهوة اللي انت بتكرها
إعملها حبيب
كل اللي في رأيك مش جايز 
دلوقتي يجوز 
و الله كبرت يا واد 
و الشعر الأبيض بيزيد 
و مفيش في حياتك أي جديد 
عضلاتك دايما" كده قافشة 
محتاجة يا واد تربيط عفشة
أو حبة تخلي الصحة حديد
و الله كبرت يا واد 
والدنيا اكيد مش واقفة عليك 
ماشية بيك أو من دونك 
وزي ما كبرت فجأة عليك
راح تصغر اشياء في عيونك
إنما في الأخر لايقة عليك

تامر محمد

ليست هناك تعليقات:

إرسال تعليق